Robert Downey Jr. (RDJ) 以及 Ryan Reynolds都係充滿個人魅力及性格嘅當紅演員，不過或者就係因為佢哋太有性格，所以近日就傳出二人於《Avengers: Doomsday》嘅片場中炒大鑊，甚至要Marvel介入先平息事件。另一方面，又有消息人士出黎闢謠，指二人無唔妥，甚至根本就無見過面。

話說日前有多個媒體引述多個「消息人士」指出，RDJ因為唔滿意替身演出、自己配音嘅效果，所以要求親自上陣重拍部份場面，但由於重拍需要三個星期、幾百萬美金，令片場氣氛非常緊張。同一時間，據報拍攝時有一位演員向另一位「唔太熟」嘅演員開咗個「越線嘅玩笑」，導致二人於片場激烈爭執，最後要Marvel插手干預，將兩位演員未來嘅行程排開，避免事情進一步升級。

雖然報導中就無公開兩位涉事演員嘅名字，但網民自動將RDJ及Ryan Reynolds列為主角，甚至仲幫人哋諗埋理由，話係因為Ryan Reynolds曾打算搵RDJ於《Deadpool & Wolverine》中客串演出，但後者拒絕而導致關係緊張。

不過好快，《People》及《TMZ》等媒體就引述另一位「消息人士」，強調RDJ與Ryan Reynolds二人「無唔妥」，更重要嘅係二人雖然知道對方係邊個，但根本就無親身見過面，自然就無辦法炒大鑊。同一時間，目前仍然無法確認Ryan Reynolds飾演嘅Deadpool會唔會於《Doomsday》中出現，亦進一步降低二人能於拍攝期間嘈交嘅可能性。

資料來源：The Express Tribune、People、TMZ