由FX製作、於Hulu上播放嘅《The Bear》（大熊餐廳）被譽為近年「神劇」之一，唔單止前三季共贏得21個艾美獎，更曾於2023年一口氣獲得23個艾美獎提名創下喜劇類影集紀錄；男主角Jeremy Allen White更創下金球獎男主角三連霸（2022-2024）、艾美獎二連霸（2023-2024）嘅佳績。不過天下無不散之筵席，據報《The Bear》將於目前拍攝中嘅第五季後正式結束，而第五季預計將於今年夏天播出。

消息係由劇中大熱配角Jamie Lee Curtis率先確認。佢喺接受《Entertainment Tonight》訪問時直接講明：「係，係結局了」，仲話「所有人都知道係大結局——佢哋由一開始就係咁計劃。」事實上，男主角Jeremy Allen White早前接受媒體訪問時，亦指劇集主創Christopher Storer本身嘅故事構想就係得4季，而去年播出嘅第四季最後一集就叫做「Goodbye」，而且仲以Jeremy Allen White之飾演嘅Carmy離開「大熊餐廳」以至整個廚師事業作結，結局嘅味道已經相當明顯。

不過，或者係FX及Hulu見到劇集仍然受歡迎想添食，又或者劇組見到第四季口碑稍為回落、觀眾唔太收貨而想有個更好嘅完結，所以第四季播出後無耐就宣佈會有第五季。據報第五季目前已於芝加哥進行拍攝，並將於今年稍後時間上線。考慮到過去4季嘅慣例，預計應該係6月左右一次過推出整季內容。

資料來源：hollywood reporter