早前Pixar首席創意長Pete Docter接受《The Wall Street Journal》訪問時，透露目前正籌備《Monster Inc.》（怪獸公司）、《The Incredibles》（超人特工隊）及《Coco》等經典作品嘅續集，相信Pixar迷都有種「啲師兄弟返哂黎」嘅感覺。 事實上從專訪中亦可以見到Pixar對於過去幾年傾重「多元」議題嘅作品成績不滿，Pete Docter甚至直言呢啲電影只係「幾億美金嘅心理治療」，似乎代表Pixar唔會再以「議題行先」，而係回歸製作能吸引人入場嘅內容。

《Monster Inc.》

Pete Docter於專訪中坦承去年推出嘅《Eilo》（外星奇遇記）中，有部份關於同性戀嘅情節被刪走，而背後嘅原因係「有啲家長唔想媒體撩開呢啲佢哋未準備好同小朋友溝通嘅嘢」（就同Snoop Dogg帶孫仔去睇完《Lightyear》（光年正傳）之後嘅反應一樣）。佢甚至直言：「我哋係黎拍戲，唔係用幾百億做心理治療。」

而後面呢一句就值得進一步解釋。Pixar近年嘅多部作品嘅故事都係來自導演本身嘅成長經歷以及陰影，除咗《Eilo》之外，2021年嘅《Luca》（盛夏友晴天）、2022年嘅《Turning Red》（熊抱青春記）、2023年嘅《Elemental》（元素大都會）等都係例子。問題就在於呢啲「導演半自傳式」電影實在無辦法引起觀眾共鳴，結果就係口碑及票房表現低落，例如《Eilo》用1.5億美金預算換1.54億票房，扣埋宣傳費同院線分成絕對係蝕到入肉。

《Luca》（盛夏友晴天）

《Turning Red》（熊抱青春記）

《Elemental》（元素大都會）

《Eilo》（外星奇遇記）

而從Pixar未來回歸製作經典IP嘅續集，就可以睇得出策略改變。事實上Pete Docter於專訪中亦指：「隨住時間過去，我了解到我嘅工作係確保作品能吸引所有人入場」，換言之過去幾年嗰啲只能取悅部份人嘅作品，未來可能從Pixar中消失。Pete Docter亦強調：「如果我哋要繼續整啲垃圾出黎的話就算數啦，我情願死喺啲我哋真心相信嘅嘢身上好過。」係咪代表其實Pixar內部都唔太信早年嘅「多元」作品？又唔知Pete Docter咁樣講完，大家會唔會對Pixar重拾信心？

資料來源：Deadline