Samsung屈機專利

文：MenClub Patrick　　圖：互聯網
POSTED ON 21 Aug 2014

成個芒屈得嘅手機，吹會推出都吹咗幾年，但近期終於有眉目，因為日本IT情報網站啱啱爆料，話Samsung已經正式喺美國提出呢個手機設計嘅專利申請，仲有傳「屈機」最快會喺2015年開售。

據講，「屈機」會用石墨烯取代玻璃去造屏幕，因為呢種好似膠膜嘅物料，透明柔軟有彈性，兼夾能夠導電，符合晒製造觸控屏幕嘅條件；配合埋軟身質料嘅機身，成部機真係可以好自由咁屈到最多90度。

設計好amazing，但到底有乜實際作用？除咗袋落褲後袋唔怕會坐爆部機外，暫時真係未諗到。不過有分析師估計過，去到2018年，將會有4成智能手機係用軟身芒，呢個始終會係一個未來趨勢。同埋俾Samsung成功申請到專利嘅話，咁又多隻靚牌同Apple打專利官司戰，到時唔慌唔屈機喇。

其實自從smartphone普及，絕大部分手機都變晒一塊板咁，好多人都覺得勁悶，於是幾間手機大廠都費盡心思度過啲新design，Samsung同LG就出過兩部弧形手機GALAXY Round同G Flex，不過目前唔可以話好賣。搞新設計花臣係必要，但筆者聽過唔少人講，最希望手機廠出番摺機，簡簡單單，或者仲嚟得實際。