天價iPhone X月底先正式開售，不過周邊配件都爭住搶飲頭啖湯。咁矜貴嘅電話，跌一跌可大可小架跡，緊係要個勁量級手機殼護一護佢。呢款Advent機殼號稱以航天級鈦金屬製成，其中最貴果款開價1,295美元，即約10,110港元，貴過部iPhone X本身呀。

Advent由新加坡手機配件商Gray製造，話用上航天級嘅第五級鈦金屬精工製成，比不鏽鋼強度高2.5倍，但重量只有一半。機殼線條分明，內層為膠邊，套實部矜貴嘅iPhone X。Advent銀色最基本款都開價645美元，折合成5,000港元；另外仲有黑色、金色、玫瑰金同幻彩色，其中最貴嘅幻彩色盛惠1,295美元，即約10,110港元，刻埋名仲要加35美元添！

你問，吓冇啦？唔防水唔防塵架？有嘅，每個手機殼都有獨立編號，限量發售，幻彩色全球只得100個咁。喂奢華手機殼係咁架啦，用嚟曬架嘛，講實用架咩？

來源：Gray