近年多個手提電話廠商都推出各式各樣嘅雙Mon機，係就係睇落好型、兩個Mon好似好方便，但實際上兩個Mon係咪真係好有用、好需要用呢？相信大家都有疑問。而LG日前正式推出嘅「轉Mon機」Wing就為大家帶黎一個單Mon與雙Mon之間嘅新選擇。

有睇過之前介紹，應該都知LG Wing最大賣點就係轉Mon。普通使用嘅時候，大家可以見到一個6.8吋、20.5:9嘅FHD+ POLED曲面Mon，喺呢個情況下用落同其他單Mon機亦冇分別，但只要輕輕一撥將個大Mon轉90度，就會露出個3.9吋，幾乎係正方形嘅GOLED平面Mon，而呢個細Mon基本上就係為多功使用而設，可以與大Mon分別執行不同App，例如之前「流出片」見到嘅大Mon導航細Mon聽電話咁，又或者大Mon睇Netflix，細Mon覆Msg之類。

LG亦有為部份App進行優化，例如睇Youtube時會將播放控制移落細Mon、又或者玩《ASPHALT 9: LEGENDS》可於上方顯示地圖。T字型嘅設計亦比打開之後一大塊嘅雙Mon機更加好揸。更設有Gimbal錄影模式，有如拎住穩定器嘅拍片效果。

相機方面，LG Wing前前後後有4個鏡頭，機背3個為主要嘅6400萬像素超高清鏡頭、捕捉全景1300萬像素廣角鏡頭，仲有個1200萬像素超廣角鏡頭就係為上面提到嘅Gimbal錄影模式而設。第四個鏡係左機頂嘅彈出式3200萬像素前鏡頭，萬一你自拍時唔小心跌機，佢仲識自己收返埋添。

硬件方面，採用Qualcomm S765G處理器、支援5G，8GB RAM、128GB儲存空間、4000mAh電池。有極光灰同幻影藍兩個顏色。Btw部機仲有防生活潑水、細Mon防刮、大Mon屏下指紋識別，成部機通過軍用標準810G耐用測試等功能。

整體黎講，LG Wing嘅設計，於依家嘅手機市場黎講絕對係一股清流，至少令你覺得佢真係有諗過點樣突圍面出，而唔係人出雙Mon我又出雙Mon，然後大家鬥砌Spec，而且Wing嘅轉Mon設計、多工配合睇落亦真係有實用之處。不過，CPU只係用上S765G就略為有啲令人失望，更重要嘅係要善用轉Mon嘅多功，其實非常依賴App關發商及LG嘅優化，如果唔係設計再好冇App用到，都係得物冇所用。

資料來源：LG