上星期同大家介紹過，美國太空總署正式啟動「Artemis計劃」，準備於2024年再次將人類送上月球，而且長遠黎講更希望登陸火星。咁成個計劃當然就唔係整支火箭，射班人上月球就完事，NASA最新就與眾籌平台HeroX合作，推出「NASA's Watts on the Moon Challenge」，為月面基地尋找能源方案，以支持人類長時間逗留月面之上，成功者更能獲得500萬美金嘅獎金。

要講到太空中最穩定而又源源不絕嘅能量，當然就係太陽能，但假若要於月面建立基地，就必須要面對月面長達350小時嘅黑夜時段，再加上極端環境，單靠太陽能不足以滿足月面基地嘅要求，所以NASA就公開招募解決方法。招攬分成三個階段，第一階段NASA會公佈一個任務背景，再加三個任務行動，而參加就要因應一個或多個任務行動提出能源分配、管理、儲存嘅方案，經NASA嘅評判審議後，每個任務行動嘅最佳方案可以得到10萬美金，亦有機會進入第二階段建造原型機，第二階段成功再獲450萬美金，然後進入第三階段，就係直接與NASA合作，製造真係會上太空嘅裝備。