隨住消息指Apple Car將與韓國Hyundai合作製作Apple Car、Amazon亦已研發無人駕駛電動車多年，智能汽車、無人駕駛汽車以至電動車似乎就係科技鉅企們嘅下一個戰場，而中國百度亦於昨日宣佈，會與同樣來自中國嘅吉利汽車共組新公司「百度汽車」，正式進軍汽車業界。

圖片：截圖自百度

據百度嘅公告，百度汽車將會獨立於百度母公司體系，著重於「智能汽車的設計研發、生產製造、銷售服務」，同時亦會將百度研發嘅人工智能、Apollo自動駕駛、百度地圖及小度車載 (類似係外置嘅汽車智能幫手) 等帶到新公司。而擁有Volvo嘅吉利汽車除咗作為戰略伙伴出錢之外，亦拎咗研發四年、上年9月先公佈嘅「浩瀚SEA」電動車架構出黎，簡單黎講就即係一個出硬件、一個出軟件黎整「智能汽車」。

百度Apollo自動駕駛汽車

Apple及Hyundai、百度及吉利呢種合作模式，對擁有人工智能以至電池技術、但唔識整車嘅科技巨企；以及識整車但缺乏人工智能、自動駕駛以及電動車等技術嘅傳統汽車生產商黎講可以話係雙贏局面。相信不久嘅將來汽車就會成為科技巨企們嘅另一個戰場。