近日Amazon及Facebook發言人證實，Amazon早於今年4月已收購FB旗下由10多名專家組成嘅衛星網絡團隊。除咗代表Amzon正加緊步伐進上SpaceX搶佔衛星網絡市場，同時標誌住FB正式退出競爭。

為咗偏遠地區居民都可以上到網，Facebook早於2013年就宣布「Internet.org」計畫，旨在提供低廉甚至免費衛星網絡服務，不過隨住其衛星網絡團隊被Amazon收購，代表咁多年嚟嘅努力最後都係無疾而終。據了解，該團隊由物理學家、硬件及軟件工程師組成，每位都有航空及無線系統相關工作經驗，今次收購除咗人才轉移之外，仲包括部分知識產權及設備，但就未知具體交易金額。

早前Amazon就宣布將斥資100億美元開發低軌道衛星（LEO），從而建立一個龐大衛星網絡向全球各地提供互聯網服務，同SpaceX、英國公司OneWeb等衛星網絡公司展開競爭。雖然目前SpaceX已經部署咗1320枚Starlink衛星，遠遠拋離一眾對手，但相信今次收購可以令Amazon追返唔少進度。

資料來源：businessinsider