人類嘅腸臟係一個非常待別嘅器官，佢係人體內唯一一個擁有完全獨立神經系統嘅器官，其神經元數目亦可媲美脊椎、僅次大腦，所以又有「第二大腦」之稱。不過近日就有科學研究指，其實腸臟先有可能係人類嘅「第一大腦」——換言之以後你話人「個腦裝屎」係唔算錯嘅！

首先要指明，呢個新研究並唔係話人類係用條腸諗嘢，亦唔係話腸臟主管人體各部份，而係講緊進化次序。據來自南澳洲Flinders大學教授Nick Spencer嘅研究，發現存在於地球超過6億年嘅水螅雖然無大腦，但就有一個與有脊椎動物嘅腸神經系統 (ENS)非常相似嘅神經系統，而正正就係呢套神經系統控制水螅嘅行動、覓食及消化，換言之對水螅黎講，呢套獨立神經系統就係佢個「腦」。於是Nick Spencer教援就認為，人類以至所有有脊椎動物嘅祖先都係先進化出腸獨立神經系統，之後先進化出更複雜嘅脊椎、大腦等器官。所以按「進化次序」黎講，大腸先係「第一大腦」。

研究同時發現，腸神經系列能透過幾千個神經元嘅合作，令腸臟肌肉一收一放造成蠕動，從而吸收食物營養，而呢種「器官肌肉使用方法」，與人體內其他冇獨立神經系統嘅器官完全唔同，而且更為複雜。

值得一提嘅係，腸臟除咗有獨立神經系統，過往亦有研究指腸臟內嘅細菌量量與品種，會影響人嘅心情、免疫系統、壽命以至腦部健康。