塑膠乃係石油副產品，又要幾百年先可以完全分解，一聽就知佢好唔環保。要環保，有人就決定唔用塑膠製品 (即係「走塑」)，有人就研究出塑膠嘅替代品。而根據中國天津大學嘅一個團隊，佢哋就喺三文魚嘅精子中搵到答案，整出「三文魚精子塑膠」，並將其研究結果發佈於《美國化學雜誌》上。

根據個研究，團體先由三文魚精子中提鍊出DNA鏈，將DNA溶於水中再與離聚物結合成為水凝膠，冷凍風乾後就會成為類似塑膠一樣嘅「DNA膠」。而喺風乾之前亦可以將DNA膠其「捏」成不同形狀，研究團隊就整出馬克杯、砌圖等作示範。

由於材料來自可循環再生嘅生物，所以其製作過程所產生嘅碳排放，比起製作一般聚苯乙烯塑膠少97%，亦可以利用DNA分解酶將其分解，甚至由於其遇水就會變回水凝膠狀態，所以回收重用亦非常方便——但亦代表DNA膠製品係唔係可以裝水，試想下用DNA膠碗食麵，食食下個碗變咗做一Pet含有「三文魚精子提鍊出嘅DNA鏈」嘅物體…

但，呢個技術嘅重點其實係在於「DNA鏈 + 離聚物 = 水凝膠」，所以理論上任何含有DNA嘅嘢，例如細菌、植物等，都一樣可以成為原材料，唔一定要用三文魚精子。研究團隊亦指DNA膠「理論上」可以用作大規模生產，或者會為「走塑」帶出一條新道路。

資料來源：EuroNews