如果你睇新聞見到警方遺失咗近40名市民嘅資料，相信大家嘅正常反應都係指責警方疏忽，不過近日日本東京警方真係唔見咗近40名市民資料後，日本網民嘅重點就唔係「唔見咗嘢」，而係「唔見咗啲咩」，因為據報導，啲居民資料竟然係儲存喺兩隻磁碟 (Floppy Disc) 之上。

圖片：Unsplash

件事係咁嘅，日本目黑區警方先後於2019年12月及2021年2月，向東京都警視廳「組織犯罪對策3課」提供咗兩隻Floppy Disc，入面總共有38名年齡介乎20代至80代嘅男性嘅名、生日等個人資料，希望「組對3課」能夠幫手檢查一下佢哋有冇黑社會背景。結果Check完確認38個人都係良民之後，目黑區警方喺今年7月醒起「組對3課」未還返嗰兩隻磁碟返黎，於是就問佢哋拎返，但組對三課已經搵唔返嗰兩隻磁碟放咗去邊。

圖片：Unsplash

事情於近日曝光，「組對3課」對外道歉，但日本網民嘅重點就放咗喺「2022年都黎緊，點解仲會用Floppy？」之上，就連報導呢單新聞嘅朝間新聞主持，1999年出世嘅井上咲樂都直言咁大個女都未聽過Floppy Disc，一開始仲以為係某種吉祥物嘅名。而日本Twitter之上亦有唔少人被「Floppy」呢個名勾起回憶。

資料來源：每日新聞