近年唔少人都會用著咩色嘅衫去代表自己支持某種理念，而日前三名俄羅斯太空人抵達國際太空站時嘅衣服就引起話題，因為佢哋著住「烏克蘭配色」黃加藍！

圖片：Roscosmos TV

卻說三名俄羅斯太空人Oleg Artemyev，Denis Matveev及Sergey Korsakov於上週五抵達國際太空站。而喺直播畫面見到，有別於平時俄羅斯太空人身穿藍色工作服，三人抵達國際太空站時係著住一套明黃色配藍色嘅新衫。於線上記者會被問到點解會著黃色時，Denis Matveev就答：「呢次輪到我哋自己揀咩色衫著，因為我哋儲咗好多黃色嘅嘢，所以我哋就會決定揀黃色衫啦。」而由於黃藍配色與烏克蘭國旗非常相似，所以就有人認為三位太空人係因為支持烏克蘭、反對俄羅斯入侵，所以先著呢套衫。

俄羅斯航太發文。圖中為鮑曼莫斯科國立技術大學校徽

而俄羅斯航太 (Roscosmos) 方面就於週六，喺官方Telegram發文反駁，話呢個報導係「外國媒體嘅可笑干涉」仲話「有時黃色就係黃色」，然後解釋指三位太空人身穿嘅黃藍配色，係來自佢哋畢業嘅鮑曼莫斯科國立技術大學 (Bauman Moscow State Technical University)，而且件衫早於「目前事態」之前就已經整好，「見到黃色就話係烏克蘭國旗就真係有啲痴線」。