唔少人都會夾埋幾個朋友共用一個Netflix帳號，但日後可能就冇呢支歌仔唱喇！隨住訂閱用戶不斷流失，最近官方再出新招打擊「共享帳號」行為，一旦偵測到用戶喺屋企以外嘅地方觀看超過兩星期，就會要求收取額外費用。

據外媒《The Verge》報導，Netflix將於8月22日起於阿根廷、薩爾瓦多、危地馬拉、洪都拉斯，以及多明尼加五個國家，率先測試全新共享帳戶收費方案。官方會依據IP、設備ID及帳戶活動等資料嚟判斷用戶住處，若然用戶離開「屋企」使用Netflix，例如去旅行或者喺朋友屋企登入帳號，帳號就會進入旅行狀態，如果「旅行」持續超過2星期，系統就會要求收取額外費用。

咁如果真係同一家人共用帳號，但又住喺唔同地方又點算呢？官方就容許用戶加錢增加額外住所，例如洪都拉斯用戶想加多一個住所就要每月畀多2.99美元。目前未知有關計劃幾時，又或者會唔會擴展到全球有所地區。