作為Tesla、SpaceX創辦人、Twitter擁有者兼世界首富，Elon Musk當然有其過人之處，但同時佢有啲決定就令人頗為費解。好似佢昨日就於個人Twitter宣佈，由即日起所有向Twitter作出電郵查詢嘅人，都會獲得一個「大便」表情符號作回覆。

press@twitter.com now auto responds with ????

— Elon Musk (@elonmusk) March 19, 2023

Elon Musk日前於Twitter突然宣佈，Twitter嘅傳媒查詢電郵地址「press@twitter.com」將會向所有來信自動回覆「大便」表情符號。換言之唔理你係咪傳媒，個電郵內容係咩，最後Twitter又有冇人答你都好，只要你向「press@twitter.com」發送電郵，你就會自得到一個「大便」作為回覆。而唔少網民亦即刻親自嘗試此功能，並貼圖確認，的確會收到一個「大便」回覆。

文青親身嘗試嘅結果

顧名思義，企業嘅「傳媒查詢電郵」一般而言都係專為接收傳媒查詢而設，理論上會由企業嘅公關團隊管理，並對傳媒查詢作出「官方回覆」。不過Elon Musk一向都對「公關團隊」非常不屑，除咗Tesla本身就冇公關部門之外，Twitter原有嘅公關團隊亦成為佢去年10月收購Twitter後第一批辭退嘅員工之一。目前未知佢今次嘅「大便自動回覆」有冇任何實質意義，定只係滿足佢個人嘅惡趣味。