早排香港政府推出新「禁煙十招」，先唔好理呢十招有冇用、合唔合理，但觀乎新聞下嘅留言，有唔少人都提出「XX夠有害啦你唔禁？」嘅反駁理由。而近日美國衛生部長Vivek Murthy就似乎係用咗同一個邏輯，佢於《New York Times》撰文，警告社交網站正危害青少年們嘅身心健康，所以要如香煙一樣加入警告字句。

Vivek Murthy

圖片：Wikicommon

《New York Times》於本週一刊出美國衛生部長Vivek Murthy名為《Why I’m Calling for a Warning Label on Social Media Platforms》嘅投稿文章。文章指責社交媒體係青少年心理危機嘅「重要原因」，並指「現在是要求社交網站必須貼出衛生部長警告標籤的時候，表明社交網站與青少年心理健康問題息息相關」、「貼上警告標籤，雖然需要國會批准，但就能定期提醒父母及青少年，社交網站尚未被證明為安全的」。

Vivek Murthy亦於文章中引用兩項研究結果，指出用「使用社交網站」與「患上焦慮或憂鬱症的機率」呈正相關，以及有半數美國青少年都同意「社交網站令我不滿意自己的身體」。以證明社交網站帶來的壞處。

Vivek Murthy亦指出，單靠警告標籤唔能夠令社交網站變得更加「安全」，但起碼會幫父母、學校、醫生及其他更了解事件，因為目前「父母們沒有安全帶可以扣、沒有頭盔可以戴，亦沒有可信任嘅專家仔細研究過後出黎同大家講社交網站係安全嘅。只有父母及佢哋嘅小朋友，於世界上最好嘅工程師以及擁有最多資源嘅公司之間嘅夾縫中，自行搵出解決辦法。」

正如Vivek Murthy所指，要求社交網站平台貼出警告標籤一事，需要美國國會通過才能推行，而目前亦唔知道國會內推呢個議題嘅風向及支持度，所以最後能否成事亦係未知之數。

資料來源：New York Times、Engadget