於運動相機界舉足輕重嘅中國品牌DJI日前推出手機穩定器Osmo Mobile系列嘅最新作Osmo Mobile 7系列，當中除咗於穩定性及跟拍性都有所進步之外，最大嘅更新或者就係加入全新「多功能追蹤模組」，令大家可以唔用DJI Mimo app，直接用手機原生鏡頭以至其他拍攝軟件拍片。

DJI推出嘅Osmo Mobile 7系列，其實有兩款產品，分別係Osmo Mobile 7以及Osmo Mobile 7P，當中絕大部份功能及更新都係兩者共享。例如能夠應付300公克重手機嘅DJI第七代防抖技術，以應對近年越黎越大部嘅旗艦級電話；以及新嘅「智慧跟隨7.0」，新增多主體辨識，而且除咗大人樣之外仲可以認到寵物同小朋友，並可透過點擊螢幕更加主要目標。另外值得一提嘅係，Osmo Mobiel 7系列嘅電池續航力長達10小時，比起上代報稱6小時24分鐘要長唔少。大家出去玩時就可以紀錄更多開心片段。

咁Osmo Mobile 7及Osmo Mobile 7P有咩分別呢？除咗顏色（前者白、後者黑）之外，最大分別在於Osmo Mobile 7P附送上述嘅「多功能追蹤模組」。DJI指呢個模組集「智慧跟隨、DJI Mic Mini 接收器及補光燈功能於一體」，而且支援手勢控制拍照、開始或停止影片錄製。更重要嘅係只要將佢磁吸於手機夾上，就能夠唔用DJI Mimo app，直接用手機原生相機app以至任何其他app拍攝，而且同樣能夠鎖定並跟隨移動中的人物。無論對創作者又或普通用家黎講都係更加方便。

售價方面，Osmo Mobile 7 套裝售價 NT$2,490 / HK$599 元，內含 Osmo Mobile 7，以及 DJI OM 磁吸手機夾 4、充電線、束口袋等配件。Osmo Mobile 7P 套裝售價 NT$4,090 / HK$979 元，內含 Osmo Mobile 7P，以及 DJI OM 多功能追蹤模組、DJI OM 7 系列磁吸手機夾、手機充電/錄音連接線、充電線、束口袋等配件。

資料來源：DJI