外媒《The Information》早前發佈咗一份有關Apple iPhone未來發展嘅收費報導，當中包括今年會推出嘅iPhone 17 Air，以及未來iPhone 18嘅相關消息。當中最吸引注目嘅，大概就係指出Apple會於明年推出首部iPhone摺機，另外亦會於2027年推出首部全螢幕手機，換言之由當年「M字額」演化而來嘅動態島亦會消失。

《The Information》指出報導綜合多個消息來源，內容涵蓋2025、2026及2027年內會推出嘅iPhone型號及款式相關新聞。首先係Apple為預計今年秋天會推出、大家基本上已經見過「全相」嘅iPhone 17 Air。報導指出Apple內部數據顯示，目前iPhone 17 Air嘅續航力只夠滿足60至70%用家嘅使用習慣，換言之有三成人可能要中途為iPhone 17 Air叉電先可以捱到一日。而Apple嘅應對方法，就係仿傚iPhone 11年代，推出內含「尿袋」嘅手機殼。

至於「一部以輕薄為賣點嘅手機、要加個有一定厚度嘅手機殼先可以捱得一日」究竟有冇意義，似乎就留待用家們決定。

至於2026及2027年嘅iPhone就稍為複雜。報導指出2026年起Apple可能會改變於秋季發佈所有新iPhone 嘅做法，2026年秋季只會發佈iPhone 18 Pro、Pro Max以及iPhone 18 Air，普通iPhone 18將會留到2027年春季先發佈。據說此安排係因為Apple打算於2026年秋季同時發佈擁有5.7吋外螢幕、打開後變8寸螢幕嘅「iPhone摺機」，而將iPhone 18推遲發佈將有助降低生產線壓力。

而iPhone 18 Pro系列，亦可能會首次將Face ID鏡頭放於螢幕之下，目前嘅動態島會進一步縮小為一個只作安放前鏡頭之用嘅小孔，。此舉亦係為咗2027年推出嘅新iPhone（即係iPhone 19，好可能係只限Pro系列）全面取消動態島、擁有真正「全螢幕」鋪路。

資料來源：The Information、MacRumors