對於大部份香港人黎講，揀iPhone定揀Android嘅背後通常都係「性價比」、「硬體性能」、「使用習慣」等原因。但對於美國嘅青年人黎講，就好可能係揀「藍色對話框」或者「綠色對話框」嘅面子問題。而近日一個研究更指出，使用iPhone嘅美國大學生，甚至願意每月多付49美金（約HK$380），保住佢哋獨享嘅「藍色對話框」。顯示出iPhone於年輕族群嘅主導地位。

所謂嘅「藍色對話框」（Blue Bubble）或者「綠色對話框」（Green Bubble），其實係講緊iPhone用家於iMessage收到訊息時所顯示嘅對話框顏色。於iMessage中，如果係iPhone用家之間互相聯絡，訊息就會以即時訊息（即係類似Whatsapp、Line等）嘅方式傳送，對話框亦會係藍色；但如果係Android用家向iPhone用家傳訊息，就會改以SMS方式傳送，而iPhone用家就會見到對話嘅對話框係綠色。

唔好睇少呢個「藍色」定「綠色」嘅問題呀！就係因為佢能夠明確標示出邊個朋友用緊iPhone、邊個用緊Android，同時又因為美國年輕人認為只有買唔起iPhone嘅人先會用Android，所以用「綠色對話框」就好可能被視為低人一等。換言之為咗避免成為異類，美國年輕人都傾向使用iPhone。

如果大家想知道更多關於「藍色對話框」及「綠色對話框」嘅事，可以睇睇「MKBHD」三年前做嘅呢條片

而據《經濟學人》早前引述芝加哥大學經濟系教授Leonardo Bursztyn嘅研究，如果要班用緊iPhone大學生關掉「藍色對話框」一個月（即係改成用綠色對話框），佢哋平均要收一個月49美金嘅「賠償」。換個角度黎講，就係即係佢哋願意每個月畀多近HK$400，去避免因為使用「綠色對話框」而被朋輩標籤為異類。

研究指出Apple透過「對話框顏色」造成社交區隔，增加「唔用iPhone嘅成本」，繼而鞏固iPhone於年輕人族群嘅佔有率。

資料來源：NON-USER UTILITY AND MARKET POWER: THE CASE OF SMARTPHONES