以360度全景相機聞名嘅Insta360，早前宣布成立子品牌「Antigravity」進軍無人機市場，今日終於正式公開首款產品「Antigravity A1」！呢部無人機支援8K解像度全景拍攝，並透過專屬眼鏡及體感手柄操作，為用家帶嚟前所未有嘅沉浸式飛行體驗。

Antigravity A1機身頂部同底部各有一個全景魚眼鏡頭，而正前方則配備兩個避障鏡頭，搭配 Insta360嘅影像縫合技術，能夠令機身完全消失在畫面之中，拍出嘅效果就如好似一部全景相機在空中飛翔。而A1亦承繼Insta360全景相機一貫玩法，用家先飛行進行拍攝，之後再喺後製時自由選擇視角、構圖及運鏡，帶嚟更大嘅創作空間。加上機身僅重249g，輕巧易攜之餘，亦符合大多數國家免執照駕駛無人機法律規定。

至於操控方面，Antigravity A1套裝配備一幅飛行眼鏡及一個體感遙控手柄。用家戴上眼鏡後，能以第一視角體驗即時全景畫面，就算無人機直線向前飛，用家亦可以自由環視四周，有別於傳統無人機或FPV穿越機咁限制視角。而且眼鏡仲配備一塊外置小螢幕，令「飛機員」身邊嘅朋友都能夠睇到飛行畫面，共享樂趣。而操作亦非常簡單直觀，只要將手柄舉向天空，無人機就會垂直向上攀升重；手柄指向邊，無人機就飛去邊，做到人機合一嘅自由探索體驗。

官方表示，Antigravity A1將以套裝形式發售（包括無人機本體、眼鏡同手柄），預計將於未來幾個月正式上市，但具體發售時期及售價尚未公布。唔知大家又有冇興趣？又或者咩價位會吸引你入手呢？