隨住AI盛行，依家唔單止有「AI性愛聊天機械人」，甚至仲有內置AI嘅性愛公仔或機器人，似乎人類於不久嘅將來就可以喺唔搵其他真人嘅情況，享受極為像真嘅性愛。但加拿大一個研究就發現，其實普遍人都未接受到其他人使用類似嘅「性愛科技」（Sextech），而且仲覺得使用「性愛科技」嘅男人比女人更加噁心，展現出一種反向嘅雙種標準。

圖片：Pixabay

其實類似嘅雙重標準於目前已經有出現，例如女性用震蛋就會被包裝為「女性自主」、「性解放」，但男性用飛機杯就係「溝唔到女」、「失敗者」。而為咗進一步研究男女使用不同「性愛科技」產品會畀人點樣嘅觀感，加拿大New brunswick大學嘅研究團隊就做咗測試，佢哋搵黎371 名成年受訪者去睇6個使用情景，亦即男性或女性使用普通性玩具（如震蛋或飛機杯）、情色聊天機械人、同埋最「擬人化」嘅性愛機械人。之後受訪者就要為每個情景嘅「噁心」（Disgust）程度評分——分數越低就越噁心。

研究發現六個情景嘅「噁心」評分都處於中間偏低範圍，換言之不論使用者性別、使用邊種「性愛科技」產品，其實都係有些少噁心。但更重要嘅係，研究發現即使用嘅係同一種產品，受訪者都會認為男性使用者比女性更加噁心，換言之，社會對男用家確實更加苛刻。

圖片：Sedoll

三種「性愛科技」產品噁心程度亦有分別。最唔噁心嘅係「普通性玩具」、「情色聊天機械人」次之，「擬人化性愛機械人」再次之。換言之越能代替真人性愛嘅科技，社會就越反感。有趣嘅係，於使用「普通性玩具」一項中男女嘅「噁心」評分差距最大，亦即社會對於男女使用普通性玩具嘅接受程度相距最遠；而到使用「情色聊天機械人」及「擬人化性愛機械人」兩項時，女性嘅「噁心」評分就追上男性，所以差距收窄。

總結而言，就即係「使用性愛科技產品」呢件事，到目前都仲未完全「去污名化」，而且男性使用者被污名化嘅程度比女性更甚。研究團隊指出今次研究係希望大家可以更開放地討論相關話題，從而消除污名化，而「理解這種雙重標準的存在，是接納所有性別使用各類性科技的第一步。」

資料來源：Gross Double Standard! Men Using Sextech Elicit Stronger Disgust Ratings Than Do Women