隨住生成式AI爆炸式增長，全球AI數據中心正「掃貨式」吸納全球記憶體及儲存裝置供應，導致相關產品價格全面飆升，其中RAM價格暴漲高達5倍，而SSD價格亦上升約1倍。記憶體價格持續高企，除咗令自組PC成本大增，最近更有消息指，情況甚至可能拖慢遊戲主機換代步伐，新一代Xbox及PS6或要延至2028年後先有機會登場。

目前一組32GB (2x16GB)  DDR5 RAM價格已直逼一部Switch 2

據遊戲界著名爆料人Tom Henderson透露，由於AI熱潮帶動需求，RAM價格在過去幾個月已經翻咗好幾倍，而且AI發展短期內都唔會放緩，所以RAM供應好有可能會繼續成為樽頸，意味價格只會越嚟越貴。呢個情況令主機製造商非常頭痛，雖然以前啲主機好多時都會提供補貼（蝕住賣），但考慮到目前RAM供應咁緊絀同價格持續上升，下一代主機售價可能貴到令人卻步，甚至覺得「離晒大譜」。

Tom Henderson亦補充，呢個情況已經令主機廠商開始討論，應唔應該將原定2027至2028年推出嘅下一代主機延後面世，期望RAM製造商有更多時間擴展產能，令供應回穩、價格回落。Tom Henderson同時認為，不過無論最終決定係點，未來呢幾年就連現有嘅遊戲主機，都好大機會進一步加價。