Apple在去年春季，為iPhone產品線加入全新入門級機型e系列，一推出即引起唔少討論。事隔近一年，近日有傳後續型號iPhone 17e最快將於下月登埸，售價預計維持不變，但規格就會有唔少升級。

據外媒《9to5mac》報導，iPhone 17e將從由前代嘅A18晶片升級為A19晶片，CPU效能預計提升約5-10％，帶嚟更強嘅運算能力及能耗控制。螢幕方面就繼續採用6.1吋設計，不過邊框會比16e更窄，外觀上更貼近iPhone 17主系列。

至於最「顯著」嘅改動，就係有傳iPhone 17e將正式改用Dynamic Island （動態島） 設計，而前鏡頭亦有望加入Center Stage（人物置中）功能，無論橫機直機自拍，都可以自動追踪人臉同構圖，唔使再刻意就位。若然屬實，意味俗稱「M字額」嘅劉海螢幕將走入歷史，以後就算係入門級機型，個樣都唔會再咁「復古」。

另外值得一提嘅係，有傳iPhone 17e將支援MagSafe，目前iPhone 16e只支援最高7.5W嘅Qi 無線充電，如果17e真係加入 MagSafe，代表至少可提供15W無線充電，同時兼容各類磁吸配件，例如銀包、支架同磁吸行動電源（尿袋）等，實用性大大提升。至於定價方面，消息指iPhone 17e將同前代一樣為持599美元，最快下個月正式登埸。