今時今日，喺交友App識人已經唔係啲咩新奇事，當中有唔少係成功發展成情侶甚至結埋婚。但大家係咪會覺得喺交友APP識嘅情侶都唔會長久得去邊呢？但根據日本電視節目嘅調查，其實交友APP識嘅情侶先至長久！

日本節目《林先生の初耳学》早前去調查透過交友APP認識嘅情侶，嘅離婚情況。節目搵黎透過交友APP認識嘅417對夫婦，發現當中19對已經離婚，離婚率大約係4.5%；而過去5年日本整體離婚率係6.6%，換言之透過交友APP認識並結婚嘅夫婦，離婚機會比起一般夫婦低近1/3。

節目組再搵黎日本家庭社會學家山田昌弘尋求解釋。山田教授就話，夫婦離婚嘅其中一個主要原因，係「估唔到佢係咁嘅人」，但交友APP本質上就係會公開對方嘅各種個人資料，包括喜好、工作之類，變相喺結婚甚至見到對方之前就已經對其有一定認識，「估唔到」嘅機會自然就減低。

但大家要注意，節目組測試嘅係交友APP，而唔係約炮APP，兩種APP雖然用法類似，但係用家嘅心態非常唔同。所以交友APP識人唔係問題，但大家要搞清楚自己想要啲咩類型嘅關係、用啲咩APP先囉！你走上馬欖以為真係有馬被你攬咁，好難幫你呢。