自從疫情橫行全球，唔少學者都希望研究疫情對人類生活嘅影響，例如我哋去年亦曾多次引述國外研究，指疫情之下大家嘅性生活次數及質素都普遍下降，疫情初期有人擔心嘅「疫情嬰兒潮」理應唔會出現——直到近來另一個研究就發現，雖然大家做少咗愛，但同時用少咗套喎！

澳洲一個研究調查咗149名異性戀成人於去年5至6月嘅性生活習慣，發現雖然大家做愛次數於疫情中的確少咗，但有做嘅時候使用安全套嘅比率亦少咗。而美國性學家Dr. Justin Lehmiller亦引用其機構於去年收集嘅超過2,000名美國異性戀成人性愛數據，發現疫情前，受訪者平均有43%時間會使用安全套，但疫情期間就只係得返39%。

特別值得注意嘅係，如果唔係有穩定伴侶嘅人 (粗略啲講，就即係週圍食嗰班人啦)，其使用安全套嘅比率由疫情嘅63%，降到疫情期間嘅56%。換言之，疫情之下，呢班人比起「有一名穩定伴侶嘅人」更願意進行不安全嘅性行為。反而「擁有多於一名穩定性伴侶」嘅人，佢哋用安全套嘅比率就由疫情前嘅45%，急升到疫情期間嘅64%。

至於點解疫情之下啲人更願意接受不安全性行為呢？Dr. Lehmiller提出「恐懼管理理論」，亦即係當感到生命受威脅時，會導致人們更傾向於有冒險性嘅性行為，而「不安全性行為」就係「冒險」之一 (具體例子請參閱《拳願阿修羅》第一話)。

而不安全性行為比例上升，除咗可能會令懷孕率上升之外，更有可能導致性病傳染率上升。再加上唔用套嗰班都係「週圍食」嗰班…或者會於疫情之後產生另一類社會問題。

資料來源：Lehmiller.com