試想像下，如果你約咗個女仔第一次見，行完街睇完戲食完飯雙方情投意合打得火熱，行出餐廳要諗下一個節目，你最想去邊？相信唔少男仔都會想返屋企——一齊返你屋企或者佢屋企，但結果通常都係各自返歸。你或者會認為係因為香港人保守，接受唔到「約會即上床」，但根據一個調查指，表面上開放得多嘅美國人其實都唔接受「約會即上床」！

根據美國Pew Research Center於2019年做嘅調查，訪問咗4,860名成年美國人對於「第一次約會時親密接觸嘅接受程度」，結果就發現只有5%受訪者認為第一次約會就上床係「完全可以接受」，加埋25%人認為「有時可接受」，亦即係只有30%人接受「約會即上床」。更重要嘅係有42%人認為約會即上床係「完全不能接受」，可見就算係美國人都冇大家想像中咁開放。

另外同一個調查亦發現，有95%人認為第一次約會可以擁抱，73%人認為第一次約會就可以接吻，對比起接受第一次約會就上床嘅30%，就更證明「約會即上床」係一件非常罕見嘅事。

當然，呢個調查結果好大程度上係基於受訪者回答時係考慮緊乜嘢情況。即係如果我嘅約會對象係早兩日介紹過嘅櫻井音乃，約會即生仔都唔係問題；但如果係諗緊我未來個女同條仔去約會，條仔望多兩眼都絕對不能接受！所以與實際行為必定有所差異。不過調查亦可以證明即使文化相對開放嘅西方國家，對於「約會即上床」嘅接受程度都頗低，換轉喺香港就應該更加難以接受。所以準備去同女仔約會嘅你，都係疊埋心水返歸瞓罷啦！

資料來源：Pew Research Center