就憑任何一個男小學雞都試過入廁格然後畀同學笑「你屙屎呀？」，你就知「企喺到屙尿」其實係男人嘅性別認同之一。不過根據日本家居用品品牌獅王嘅一個調查，原來日本大部份男性都已經改成「坐喺到屙尿」。

日本獅王為咗推廣一款馬桶清潔劑，於是就拍咗條片話畀你班男人知，企喺到屙其實係會彈到週圍都係；與此同時佢哋又做咗個調查，訪問1,500位20代至60代男性，發現當中有11.9%已經改成坐喺到屙，又有49%係有時企有時坐，亦即有6成人都已經有坐喺到去嘅習慣，只有39.1係堅持企喺到。

調查同時亦問到男士坐喺到去嘅原因，當中有37.3%受訪者話係因為「發現企喺到去會彈到週圍都係」、27.9%話係「為清掃廁所嘅人著數」，又有19.3%人話「因為依家係我洗廁所」，所以揀個最「冇手尾」嘅方法，仲有16.6%就係因為「被身邊的人勸告」而改。咁睇黎為人為已，都係改成坐喺到屙好啲？咁商場又係咪應該加返啲男廁格過我哋？