呢排轉天氣，唔少人都有啲傷風感冒幾聲咳、流下鼻水有鼻塞，如果你自問唔算好嚴重，又唔太想去睇醫生，或者都會選擇食成藥黎舒緩症狀，但根據一個小型研究，其實係有一個更舒服、更天然嘅方法黎對抗鼻塞——就係高潮！

首先，傷風感冒造成嘅鼻塞，主要係因為鼻道血管擴張引致，而一般嘅通鼻塞藥，其實就係幫手令鼻道血管收縮，咁就唔塞啦。而有人就發現人類高潮後嘅人體反應之一，就係透過影響交感神經而令血管收縮，簡單黎講就即係高潮同食通鼻塞藥係有同一個效用。

進一步嘅研究就搵黎18對異性戀伴侶 (當中有一半有醫護背景)，並要求佢哋利用特製嘅儀器去量度自己性愛前、高潮後即時、高潮後30分鐘、一個鐘及三個鐘後嘅鼻塞情況，研究對象亦會紀錄主觀感受。另外佢哋亦會使用通鼻塞噴霧作為對照。結果就發現無論係客觀數據定主觀感受、亦無論是男是女，高潮的確能夠即時改善鼻塞情況，其效用仲同通鼻塞噴霧近似。

唯一嘅分別就在於效果嘅時長。數據指通鼻塞噴霧就算於使用後三個鐘都依然繼續發揮效力，但高潮嘅效果就只能維持一個鍾左右，之後效果就慢慢消退，個鼻亦會開始塞返。研究就冇講如果呢個時候即刻再高潮一次係咪都仲有用，亦由於研究方法所限，未知自慰得到嘅高潮效果會唔會有所差別。但對於近排有鼻塞又有伴侶嘅大家黎講，或者提供多一個做愛嘅理由？