今時今日，啲咩綠帽、被綠嘅事都已經唔能算係新聞，頂多係大家茶餘飯後會講下嘅輕鬆趣事，可想而知出軌其實相當普遍。但普遍還普遍，畢竟冇人希望自己嘅伴侶出軌，咁又有冇方法可以「預測」另一半會否出軌呢？ 一個最近發佈嘅研究就採用機器學習去分析數據，結果發現出軌嘅四大特質。

該研究由英國Surrey大學以及美國明尼蘇達大學嘅兩位學者共同參與，搵黎近900位成年男女、以及202對異性伴侶分別回答關於真人出軌，以及網上出軌 (即係玩裸聊之類) 嘅經驗，再加上佢哋嘅性生活、關係狀況、年齡性別以及性格等資料，以機器學習嘅方式試圖搵出能夠「預測出軌」嘅特質。結果就發現，並無任一個特質，包括男女、年齡等，能夠準確預測到人嘅出軌行為，而係需要多個特質加埋先知能夠「一定程度上」預測得到。

不過，研究團隊亦總結四個最關鍵嘅出軌特質，分別係「對目前關係滿意度較低」、「目前性滿足度較低」、「自認對伴侶嘅愛較少」以及「整體而言性欲較強」——除咗最後一個之外，基本上都係講緊本身段關係有問題，所以似乎出軌多係「推因素 (Push factor) 」多於「拉因素 (Pull factor)」。但研究團體亦特別提到，係搵到有人對段關係好滿意都照出軌。

另一個有趣嘅發現，就係受訪者對於性嘅態度同樣反映其出軌嘅可能性。研究指如果受訪者曾經試過「多種不同嘅性行為」，例如用性玩具或肛交，佢哋就更傾向會出軌。反觀嗰啲對性已經好保守嘅人，出軌機率就會低啲。研究話未必係佢哋對出軌冇興趣，而係因為佢哋對「出軌」呢件事有道德批判。

縱然呢個研究無法搵到有效「預測出軌」嘅方法，但起碼提醒大家「出軌」呢家嘢並非單一條件推動，而且好多時都係同本身段關係有關。所以與其不斷地「預防出軌」，不如畀啲心機經營好段關係？

資料來源：Is Infidelity Predictable? Using Explainable Machine Learning to Identify the Most Important Predictors of Infidelity