世上嘅避孕方法有好多種，有人靠安全套、避孕丸，有人靠絕育手術、子宮環，當然亦有啲人係靠個樣就可以避孕。但根據位於南澳洲Flinders大學嘅一個研究，其實仲有一種避孕方法有顯著效果——就係生個小朋友！

就算未生過小朋友都會估到，照顧一個初生嬰兒係需要大量時間、心力，而且頭幾個月幾乎都冇覺好瞓，唔好講父母嘅性生活，連正常生活都會大受影響。不過根據是次研究，「冇覺好瞓」就唔係令到父母性愛次數減少嘅主因。

Flinders大學嘅研究團隊搵黎近900對育有1至18個月大初生嬰兒嘅父母，透過網上問卷收集佢嘅行房頻密度、滿足度、睡眠習慣、抑鬱傾向等資料，再透過先進嘅監視鏡頭去紀錄父母每晚會去睇幾多次個小朋友 (不論小朋友是否哭喊)，結果發現每晚去睇個小朋友0到0.5次嘅父母，每個月平均會做愛4.2次；反之如果每晚會去睇個小朋友4次或以上，每月做愛次數就會降到2.3次。

換言之，唔係小朋友瞓得唔好、令到父母都瞓得唔好，所以父母嘅做愛次數會下降，而係哪怕小朋友瞓得好好，但父母成晚都走去望下佢嘅話，父母嘅做愛次數都會下降，而且研究團體指當中嘅關係非常強烈。研究團隊亦指出，嬰兒剛出生嘅幾個月內的確係會經常半夜紮醒需要父母安撫，但其實去到出世後半年左右，嬰兒就可以慢慢學識自己一覺瞓天光。佢哋又指性生活其實同睡眠一樣，都與大家嘅健康生活息息相關，所以鼓勵父母要教識嬰兒自己瞓覺，等父母都可以「有得瞓、有得震」。

資料來源：Let’s Talk about Sleep Baby: Sexual Activity Postpartum and Its Links with Room Sharing, Parent Sleep, and Objectively Measured Infant Sleep and Parent Nighttime Crib Visits