「認路」乃係唔少情侶出去玩時，最常產生爭執嘅原因之一，甚至有唔少男士認為女性天生就係唔識認路。近日一個意大利研究就發現，雖然女性的確比起男性更容易認唔到路，但實際上「認唔到路」嘅人只佔人口3%——換言之大家日常生活接觸到嗰班大叫「認唔到路」嘅人，其實大多係「唔想認路」？

首先，研究中嘅「認唔到路」其實有個學名，叫「Developmental Topographical Disorientation (DTD，發展性地形迷失)」，意思係指認知能力冇問題，但就唔知點解個腦缺少地形認知及導航能力嘅神經障礙，具體黎講就係患者認得出不同地標、地點，但就冇辦法於腦中描繪出地點嘅相對位置，所以冇辦法由A點去到B點，嚴重者連喺自己屋企入面都會蕩失路。

而為咗知道意大利年輕人嘅DTD情況，來自Sapienza羅馬大學心理學系嘅Laura Piccardi就與其團體做咗個研究，搵黎超過1,600名年齡介乎18-35歲 (當中635名為男性)、平均學歷為14.8年嘅意大利年輕人，透過自行回報嘅問卷 (如：你閱讀地圖的能力有多高？每星期蕩失路幾多次？)，再結合年齡、性別、病歷、日常認知能力情況等去斷定一個人有冇患上DTD。

結果發現，「不出意外」地，女性受訪者更傾向回報有「方向感問題」，同時亦更傾向用地標認路 (即係去到一個全新嘅地方，又或者睇地圖時會認唔到路)，不過研究就指男性患上DTD「嘅風險亦在增加」。更重要嘅係其實只有3%受訪者係真正患上DTD，換言之絕大部份人嘅認路能力都係冇問題。至於點解能力冇問題都係認唔到路、睇唔到地圖？有冇聽過一句嘢係「非不能也，是不為也」？

資料來源：“Where am I?” A snapshot of the developmental topographical disorientation among young Italian adults