靚仔靚女就係人都鍾意，而過往心理學界一直有個假說，就係靚唔靚其實係同身體健康相關，所以當我哋被「靚人」吸引，實際上其實係被「健康嘅人」吸引。而近日一個挪威研究就似乎證實咗呢點，不過更有趣嘅係，研究亦發現被認為「極樣衰」嘅人，身體其實一樣好健康！

為咗嘗試證實「外貌吸引度」以及「身體健康」之間嘅關係，兩名來自挪威奧斯陸大學嘅教授，利用咗美國「全國青少年至成人健康追蹤調查」嘅數據，先係搵黎另一批受訪者，為追蹤對象嘅外貌作評分，然後利用追蹤調查中能夠反映免疫力、新陳代謝以及心血管健康嘅「心臟代謝風險指數 (CMR) 」作為健康程度嘅依據，再將兩者對照試圖搵出當中關係。

結果就發現，「外貌評分」高於平均嘅人，於十年後嘅「心臟代謝風險指數」比只有「平均外貌」嘅人低，而且即使考慮埋另一重要健康指標「BMI」，統計學上依然能夠用外貌去推斷個體十年後嘅「心臟代謝風險指數」。換言之只要你生得夠靚，即使BMI唔係最標準，十年後你都好可能比起「平均外貌」嘅人更健康。

咁你可能會話，啲靚人本身已經靚，依家仲要好健康，咁點夠佢哋玩呀？咁你又唔使灰心，因為同一個研究發現，嗰啲被評為「非常不吸引」嘅人，十年後嘅「心臟代謝風險指數」亦同樣較「平均外貌」嘅人低。而2018年嘅一個研究亦證實，「外貌非常不吸引」嘅人，收入會比「普通不吸引」嘅高得多，甚至比起一眾「平均外貌」以及「靚人」都仲要高。證明樣衰到極致可能都有著數。

資料來源：Physical attractiveness and cardiometabolic risk