Tenga嘅出現，可以話係唔少男士嘅深夜福音，令佢哋唔洗再「一雙手 可以不求人 頑強面對」。以近年Tenga嘅發展亦蒸蒸日上、越做越大，據報目前正在販售嘅產品就已經多達163種，為大家提供各種「貼身娛樂體驗」。但原來大家嘅歡愉背後，有一個人日以繼夜、冒著健康風險地、搞到手都震埋咁為開發新產品而努力。而佢就係Tenga社長松本光一。

卻說早前日本商業媒體《新R25》前往Tenga總部訪問松本光一社長，訪問中除咗提到佢創立Tenga嘅理念、過程之外，松本社長更透露佢於產品開發時擔任嘅角色。據社長講，公司創立至今推出嘅每一款產品，其實都係經佢本人親身使用過後先會正式投產。為咗模仿客人們嘅使用情境，社長都會返到屋企後，於放鬆狀態下開始試用，之後再將使用體驗回報畀團隊，以協助改良產品。所以目前大家見到嘅每種Tenga產品，背後都有社長嘅「血汗」在。

但你又唔好以為使用係一個非常快樂嘅過程。社長提到，由於公司開發新產品嘅速度非常快，佢曾經遇過員工同佢講：「社長，呢度有48款飛機杯，麻煩你聽朝之前揀五個黎使用，之後話畀我知你嘅意見。」然後佢就真係返屋企「完整體驗」曬五款產品。由於使用一次需要花費大量「精力」，社長表示有時需要靠藥物幫助，整個試用過程更由半夜12點搞到第二朝5點，佢笑稱試到最後一個時，真係手都震埋。

呢啲，或者就係日本嘅「職人魂」啦！