迪士尼樂園大概係所有情侶去東京旅行時必去景點之一，但其實日本一直有個都市傳說，就係「情侶去迪士尼樂園就會分手」，搞到有啲人真係唔敢去。不過，近日有日本戀愛結婚情報網站進行咗個實際調查，發現真係因為去完迪士尼樂園而分手嘅情侶，僅佔0.8%，相信唔單止情侶們放心，連米奇老鼠都會好放心。

東京迪士尼

圖片：東京ディズニーリゾート

卻說「去迪士尼會分手」呢個都市傳說於日本頗為流行，於是戀愛情報網站「Angel」於7月時就進行個調查，以驗證都市傳說嘅真實性。喺訪問咗482名日本男女後，發現當中有85%都曾經聽聞過呢個都市傳說，但67%人依然會選擇迪士尼樂園作為約會地點，表示大部份人都不受都市傳說影響。而有去迪士尼約會嘅人當中，亦只有0.8%係真係會因為去迪士尼而分手，完全破解咗呢個都市傳說。

事實上真係分咗手嘅人，亦表示重點不在於樂園本身。有27歲女性受訪者表示，由於喺樂園中成日需要長時間等待，雙方選擇四圍行、放鬆坐低等定不停花錢，都會展示出生活價值觀。而價值觀嘅不同先係分手嘅真正原因。另外分別有38歲及42歲嘅女性受訪者，表示因為見到男方於樂園中亂使錢而感到價值觀不合，最後分手收場。

簡而言之，就即係去邊個樂園唔係重點，只要係大家長時間相處，就有可能因為觀察到對方嘅價值觀與自己不合而令感情生變。亦即係話情侶唔使刻意避開迪士尼，因為大家唔夾嘅話，落樓下公園一樣可以唔夾。

資料來源：otakuma經濟新聞