網購平台嘅湧現，除咗令大家嘅日常生活更加方便之外，亦令唔少人一時貪得意買咗好多「唔等使」嘅嘢返屋企。好似「牙膏噴嘴」呢家嘢，相信絕大部份人都唔知原來有啲咁嘅產品、當然亦唔會諗過要買、買咗都一定唔會用。但睇完以下呢個「The Rock」(Dwayne Johnson) 噴嘴，或者你都會心動！

所謂「牙膏噴嘴」，其實就係裝喺普通支裝牙膏上，令「擠牙膏出黎」呢個過程變得稍為有趣嘅配件。而日本網媒《Rocketnews 24》嘅記者「砂子間正貫」，早前於AliExpress (即淘寶外國版) 上發現咗一個3D打印嘅「The Rock頭」造型噴嘴，裝咗上支牙膏到之後，你每次刷牙時都可以見到「The Rock口吐白色濃稠膏狀物」嘅畫面，荒謬得黎又真係幾好笑。而且售價只係292Yen (約HK$15.7)，連埋運費都只係500Yen (約HK$27) 左右，莫名地令人想買。

不過經過記者實試之後，就發現個「The Rock頭」並不適合本身噴嘴位冇螺絲紋嘅牙膏，一擠佢就整個「人頭落地」，而就算能夠成功裝上，亦因為「The Rock」個「櫻桃小咀」太細，所以要好用力擠得出牙膏。最後佢要自行改裝先成功使用。

另外，據AliExpress上嘅賣家頁面顯示，賣家「Huang-tools Store」嘅所在地為中國，所以呢個「The Rock頭」都好可能係「中國製造」。