現代人越黎越唔拍拖、唔結婚，就算結咗婚都好多離婚收場，似乎男女主角「快快樂樂咁生活下去」結局只能出現於故事之中。而近日日本婚姻介紹公司Presia公佈嘅一項調查，似乎亦證明「婚姻已死」嘅論調。事關調查顯示有超過七成已婚女士表示後悔結婚，更有54%女士表示如果有得返去以前再揀過，唔會再揀呢個老公黎結。

「你是否曾後悔與現任丈夫結婚？」

「選擇結婚對象時，不該妥協的事是什麼？」

圖片：PRTimes

Presia早前訪問咗287名年齡介乎20至59歲嘅已婚女性，當中有70%表示「後悔與現任老公結婚」，當被問到「如果可以重生，你仲會揀呢個男人做老公嗎？」時，更有54%受訪者回答「唔會」，似乎顯示大多日本女性都唔滿意自己個老公。

而當被問到後悔嘅主要原因（「選擇結婚對象時，不該妥協的事是什麼？」）時，有22%（65名）女性表示因為係（低）收入、近15%女性認為老公嘅金錢觀念，換言之近四成女性都係因為金錢問題而感到後悔。另外「老公嘅家務能力及意欲」（11%）、「價值觀」（11%）以及「與夫家嘅關係」（8%）亦係熱門後悔原因。

選擇結婚對象時，「妥協也無妨」的事項是？

哪些時刻讓你覺得「和這個人結婚真是太好了！」

圖片：PRTimes

不過調查都唔係只得壞消息，因為有36%女士們表示，如果有得再揀的話，「外貌」會係佢哋最先妥協嘅條件，壓倒性高於其他條件。有受訪女性更直言「老公嘅外貌於婚姻生活中唔太重要」，所以自認內在比較吸引嘅男士其實仍有市場。另外值得一提嘅係，於同一個問題中，只有不足3%女性認為「經濟能力」係最不能妥協嘅，「金錢觀念」更係只有兩名，所以日本女性其實都唔係凡事都講錢嘅。

另外調查亦有問到已婚女士「慶幸結婚」嘅原因，當中排名最高嘅係「在一起時不會感到不自在」（15.6%），其次係「讓我感到自由」（12%）、「喜歡小朋友」（10%）、「溫柔善良」（9%）以及「感受到他對我的愛」（7.6%）等。可見令女性於婚姻中感到幸福嘅原因，大多來於二人嘅性格及相處方式。

資料來源：PRTimes