其實早於舊年一月，我哋就曾經介紹過身兼寫真偶像及職業雀士 (麻雀選手) 嘅「岡田紗佳」，點解依家又要介紹多次？唔係因為佢呢一年又影咗好多性感靚相，而係佢近日於日本麻雀比賽中又食出奇牌——「叫十三飛嘅十三么 (日本叫國士無雙)」！就算唔睇佢嘅好身材，睇佢打牌都夠令人興奮呀！

現年28歲嘅日中混血兒岡田紗佳，由於屋企就係開麻雀館，所以自細就已經識打牌。長大後除咗擔任模特兒外，亦成為職業雀士參加各項比賽。而其成名作就係3年前食出「日本電視史上首次九蓮寶燈」，即筒索萬任何一色，於門清情況下儲齊1112345678999加多任何一隻，條片於YouTube上有成900萬次觀看，可見係幾咁神奇。

而近日岡田紗佳參加日本「麻雀最強戰」時又再次食出奇牌。東三局一起手就已經有8隻么牌，第一隻再摸紅中，到第十輪就儲齊13隻么牌，差對眼就食糊，即係叫13飛。佢隨即立直叫糊，一輪之後就由對家瑞原明奈出統，食咗鋪32,000點嘅「役滿」。

比賽播出後，唔少網民都驚訝岡田紗佳喺短短幾年內，就食咗兩鋪好多人成世見都未見過嘅奇牌，仲要係有電視轉播嘅比賽之中，情況非常罕見。相比之下，佢個E Cup身材好似就冇咁有衝擊力啦。

IG：sayaka_okada