如果大家好記性，或者會記得我哋2月時曾經報導過，日本有位女高中學生因為於IG發佈咗張與內衣品牌合作嘅廣告相，所以於學校修學旅行前三日被強制退學嘅事。該事件曾經一度成為日本網絡熱話，亦令事件主人翁「ちーまき」人氣急升，最近仲獲得《週刊Playboy》邀請，拍攝首輯寫真，睇黎都算得上係因禍得福。

卻說2月時，「ちーまき」於IG上透露自己因為幫個內衣品牌賣廣告，突然被學校勒令退學，連三日後嘅修學旅去都唔到。事件曝光就因為「ちーまき」嘅外貌身材，以及學校頗為不近人情嘅做法而成為網上熱話。而《週刊Playboy》六月時就邀請「ちーまき」進行「初水著寫真」拍攝，同時又訪問下佢嘅近況。

「ちーまき」就表示，當時被勒令退學嘅原因，其實唔係因為「內衣」，而係因為「廣告」，因為學校禁止學生做兼職，而「IG廣告」就被視為「兼職」嘅一種。當時為咗說明情況，佢仲同媽媽一齊去同學校解釋，但學校都係維持原判。「ちーまき」亦表示自此之後佢個IG就被媽媽嚴格審查，就連想Post同屋企人去餐廳食飯慶祝生日嘅相，都會被媽媽鬧「做咩要Post高級料理」。

但另一邊廂，媽媽似乎就支持今次去東京拍攝，兩母女仲順便喺東京旅遊一番。事實上《週Play》嘅寫真，就令大家睇清楚「ちーまき」嘅真實樣貌及身材，的確係頗為出色。而「ちーまき」亦表示經過今次之後，佢都幾鍾意拍攝寫真，希望未來能夠再有機會。或者，不久嘅將來我哋就會見到佢於寫真界大展拳腳？

IG：116tn_