大部份幕前工作，其實都係向大眾賣緊一個「幻想」，尤其係「偶像」類嘅幕前工作，就更加要營造一個「我屬於你（哋）」嘅感覺先可以留住Fans。亦正因如此，萬一偶像被爆有（疑似）緋聞，輕則事業受挫，重則就被團體處分。好似今晚要介紹嘅呢位「石井優希」咁，就曾經經歷過類似嘅事件啦。

琴日（28日）迎來19歲生日嘅「石井優希」，早於2016年，即係11歲時就加入偶像團體「原宿駅前パーティーズ」成為練習生，再於2018年正式出道。隨後於2021年成為另一隊女團「mai mai」嘅創始成員之一，但活動咗一年團體就解散。好在佢於2022年參加《週刊Young Jump》舉辦嘅著名高中女子校服選美比賽「制コレ」獲獎，順勢就加入寫真界，人氣開始上升。

去年4月時，佢加入女團「Flutter ♭」再次偶像出道，不過短短五個月後就因為「與Fans私下交友」，與另一位成員一同被團體開除，本來稍有起色嘅偶像又再受挫，直到近日為《Flash》拍攝新寫真先再次露面。佢於新訪問中亦坦承過去嘅偶像活動以失敗告終，但四年時令佢學到好多嘢，未來會繼續努力咁話。其實偶像之路行得咁唔順，直接轉型做寫真女星好似都唔錯呀？

IG：ishii_yuki__