以往嘅聲優只需要把聲有特色、能夠演繹角色嘅神粹就已經足夠，但後來唔單止要唱歌好聽、仲要自己都有返咁上下顏值可以走出幕前。發展到今時今日，已經唔係「生得靚嘅聲優走出黎見人」、而係「生得靚嘅人走去做聲優」，好似今晚要介紹呢位「礒部花凜」就係最好嘅例子啦。

現年31歲嘅「礒部花凜」出身於日本奈良縣，早於學生時期嘅佢就因為去睇過一場演唱會而深受感動，於是走咗去學唱歌。不過首先令佢成名嘅就唔係佢嘅歌聲，而係佢嘅外表。事關2014年時佢去參加日本區環球小姐選美，仲成為奈良縣代表，雖然最終未能代表日本出戰，但就已經令佢廣為人識。

明明可以靠樣搵食，但佢堅持要靠歌唱實力。2015年佢為動畫《Go Princess 光之美少女》唱主題曲，正式踏入聲優界。往後佢曾為《Just Because!》嘅「夏目美緒」、 《偶像大師 閃耀色彩》嘅「月岡戀鐘」、《賽馬娘 Pretty Derby》嘅「第一紅寶石」等角色配音。2019年又加入組合「BlooDye」歌星出道，早兩年開始仲踏足埋寫真界、出埋實體寫真集，號稱聲優界寫真公主。聲優、歌手、寫真佢都玩哂，真係相當全能。

IG：caririn.official