大家有無試過因為同一時間經歷好多事，所以即使實際時間唔係過咗好耐，但體感時間就長得多嘅錯覺？我每次見到今晚介紹嘅呢位「菊地姫奈」時，都會有呢個感覺。事關佢自出道以黎，就一直雄據各大雜誌嘅寫真版位，作品多到數都數唔到，好似已經出道十年咁。但其實佢今年都只係21歲咋！

出生於2004年嘅菊地姫奈自細就憧憬成為偶像，曾經參加「早安少女組。」選拔試可惜未能入圍，直到16歲時由媽媽推薦下報名參加選美比賽「Miss Teen Japan 2020」，並以關東區代表身份殺入決賽。雖然最後與冠軍失之交臂，但就成功引起經理人公司「BLUE LABEL」注意，簽佢成為旗下藝人正式出道。其後更憑住青春豐滿身材於講談社兩大選美活動「Miss iD 2020」及「Miss Magazine 2020」雙雙獲獎，從此就成為寫真界當紅巨星，成為各大青少年雜誌封面常客，同時亦客串多部劇集及電影。

而近排佢又多咗個新稱號叫「令和完售女王」！事關佢於今年3月推出第三本實體寫真集《memory》，憑佢本身嘅身材人氣、宣傳照中裸體上陣嘅大膽尺度、以及「20歲最後一本寫真」嘅賣點，所以第一版三萬本一出即告完售，出版社要立即加印應付市場需求。據估計最後賣出超過五萬本。睇黎今年年尾嘅寫真頒獎禮，佢都應該榜上有名啦！

IG：hina_k_1019