好多人都覺得靚女嘅人就係「Easy Mode」，做咩都特別容易、特別多人幫。但其實唔少靚女嘅人生都唔好過。好似今晚要介紹呢位「藤井サチ」咁，雖然擁有大家都羨慕嘅「人生贏家」牌面，但喺黎緊推出嘅攝影集中，就透露自己十幾歲時經歷抑鬱及厭食，人生長期處於「陰天」。

睇牌面，現年28歲嘅「藤井サチ」絕對係人生贏家：由於媽媽係美國人，所以天生就有可愛嘅混血兒外貌，而且據報佢屋企經濟條件「極好」，理應係可以被當公主養大。而佢本人於14歲時就已經被星探發掘，15歲就已經做到日本少女夢寐以求嘅時尚雜誌《Seventeen》專屬模特兒。更過份嘅係佢發展演藝事業之餘連讀書都勁，2015年入讀日本著名嘅「上智大學」；大學期間又從《Seventeen》升級到更出名嘅《ViVi》雜誌做模特兒。2020年寫真出道後人氣亦節節上升。整個人生就如坦途一樣。

今年7月宣佈與「一般男性」結婚嘅「藤井サチ」，早前宣佈會於1月尾推出首本攝影集，當中除咗會公開佢對美容及造型嘅心得之外，亦會首次剖白佢年少出道時面對嘅困難。據宣傳物料指出，「藤井サチ」嘅童年其實非常孤獨，一直都想隱藏自己，到十幾歲時更患上抑鬱及厭食，過住每日都係「雨天」嘅生活。至於佢嘅人生後來係點由陰轉晴？咁大家就要去買佢本書黎睇啦——咪當買本比較多字嘅寫真集囉！

IG：sachi_fujii_official