【一戰定生死】歐霸曼聯壓力無限大

文：李羅渣　　圖：互聯網
POSTED ON 24 May 2017


自從英超曼聯以2-0輸俾阿仙奴之後，自知同前四無緣，之後幾場聯賽個心基本上都去咗斯德哥爾摩，煞科戰對水晶宮仲出咗大部份青年軍，再加傷愈復出一個月左右嘅朗尼同因爲父親過身嘅普巴領軍，為嘅都係希望兩位喺今晚場大戰之前盡快重拾比賽狀態，務求歐霸盃決賽要手刃阿積士，曼聯下季係龍係蛇，全靠呢場波，相比以年青球員做骨幹嘅阿積士，紅魔壓力真係大得交關。

四月開始傳媒已經傳緊馬體會前鋒基沙文會加曼聯，尋日法國電視台TMC喺節目度就訪問基沙文下季有幾大機會過檔曼聯，佢就話大約六成機會，而呢兩個禮拜就會決定到，相信都係睇埋曼聯能唔能夠透過歐霸盃入到歐聯分組賽，入唔到啦喎，咪好似佢上星期咁講，轉打籃球去紐約人好過囉。而如果下季入唔到歐聯，吸引球星吸引力亦會大減，紅魔要復興，難度又大咗。另外如果連續兩年入唔到歐聯，贊助商adidas亦會削減對曼聯嘅贊助預算；而曼聯喺華爾街上市，招股中列明52個風險中，連續兩季入唔到歐聯都榜上有名，一輸唔見咁多錢，你話曼聯點會唔大壓力。

雖然曼聯一路打入決賽對手只有切爾達係比較強，但曼聯喺近7場淘汰賽都未試過入多過兩球，攻擊力相當成疑。而呢隊阿積士，平均年齡只有22.5歲，足球生命只係剛剛開始，就算輸波，將來都大把世界，再加上隊中唔少球員都有被歐洲球會睇中，好似19歲嘅射手多爾堡特，曼聯就已經多次派球探去荷蘭視察過佢，今次佢就俾個機會摩連奴近距離認識佢。至於防守，四強時艾歷拜利懷疑被切爾達球員種族歧視而與對方球員起衝突領紅停賽，中堅睇怕只有史摩寧、鍾斯同白蘭特選擇，情況令人擔心，唔知老豆會唔會放手一搏，俾曾經防守山齊士成功嘅杜安辛比擔正？

如果今場波我係曼聯領隊，我絕對會加強進攻，以爭取上半場領先兩球為目標，盡快打沉阿積士嘅意志，阿積士球員雖然年青有活力，但應付大賽經驗亦相對較弱，所以令對手相信球賽無力回天係絕對重要。有朋友話如果曼聯呢場輸波，真係會俾人笑足一年，不過摩連奴執教生涯，都無試過喺盃賽決賽輸波，相信呢次唔會開齋⋯掛？


李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員由懶到出汁變成泰拳愛好者除咗足球最鍾意就係睇戲、睇書、飲兩杯唔求發大達，最想成為有些少生活品味嘅偽文青。