【益街坊】大台播波皆大歡喜

文：李羅渣　　圖：互聯網
POSTED ON 31 May 2017


話說樂視因爲財務問題搞到失去英格蘭足總盃決賽播放資格，就算樂視賠三個月月費比客戶都難平民憤。呢次TVB就抵讚，冷手執個熱煎堆兼夾擺喺免費台播，仲有呢排人氣急升嘅「游生」兼資深阿仙奴球迷袁文傑同荷蘭叻講波，都幾令人期待。就連平時無睇開波嘅朋友都湊熱鬧睇埋一份，令足總盃忽然變咗當晚嘅熱話，美中不足嘅可能就係叫咗阿叻坐喺度噴口水花。

其實大台間唔中都會播下國際友誼賽咁嘅，以前甚至試過播德國盃賽事，不過可能係時間太夜嘅關係，加上香港球迷唔多認識就無乜人留意。TVB近年劇集收視麻麻，早排公布2016年全年業績時，大台純利更大幅下跌63%，金額只有5億。為賺廣告收入，真係乜都要試下。今次足總盃決賽外間反應都叫唔錯，英超轉播權真係太貴，不過呢種盃賽TVB都可以考慮下買幾場嚟播，如果成效理想，就可以買多啲唔同嘅賽事，反正而家星期六日嘅節目，根本就留唔到觀眾坐喺屋企睇電視。

不過大家最關注都係TVB本身嘅旁述陣容，相信都唔會有太大期望，但估唔到連鍾志光同潘文迪都講到一舊舊咁，最大驚喜反而係袁文傑，其實都唔使咁意外，因為游生未執大台前都有喺網台做足球節目，底子一早就打好晒。雖然袁文傑出晒名係阿仙奴球迷，不過就無因為咁喺分析上偏幫愛隊，做到真正客觀分析相當抵讚，就算唔同同場三位比，袁文傑表現都好過部份做緊收費台嘅評述員，與其用返已經知道唔掂嘅人，不如俾啲機會有睇開波嘅artist，話唔定仲有驚喜。

講返足總盃，呢場最大話題當然係到底車路士可以拎埋足總盃做雙料冠軍，定係雲爺爺憑足總盃冠軍保命留隊？最後阿仙奴有點令人意外咁以2-1擊敗車路士捧盃，相隔幾日雲爺爺亦成功獲得阿仙奴提供兩年嘅續約合同，完成續約後佢將會至少執教阿仙奴至2019年，唔知咁嘅結果對於一眾阿仙奴球迷黎講係好事定係唔好事啦。

另外因爲小弟公務繁忙，所以呢篇將會係喺menclub 最後一篇文章，無論過往你點睇我嘅文，我仍然非常多謝各位花時間去睇同討論，更重要當然係多謝魏文青同Mr.波特幫手處理我嘅文章，希望將來仍然有機會同menclub 合作，各位後會有期，江湖再會！


李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員由懶到出汁變成泰拳愛好者除咗足球最鍾意就係睇戲、睇書、飲兩杯唔求發大達，最想成為有些少生活品味嘅偽文青。