【支持本地體壇】《第60屆體育節》嘉年華暨閉幕典禮

文：MenClub Mr.波特　　圖：互聯網
POSTED ON 06 Jun 2017


本地一年一度嘅體育盛事《第60屆體育節》喺岩岩6月3同6月4號九龍公園舉行左嘉年華暨閉幕典禮，吸引左唔少市民到場參加，體驗一下體育所帶黎嘅樂趣。而Mr.波特我亦親身去到現場親體驗下香港本地體壇嘅一大盛事。

今次香港體育節喺3-6月期間舉行，有多項體育比賽進行，其中包括唔少大路運動，好似籃球、足球、乒乓球、羽毛球等等，亦有一啲較為冷門嘅運動，好似拔河、健康輕排球、手綿球等等，合共多達72項比賽。

而喺今次嘉年華暨閉幕典禮期間，大會安排左多個香港本地多個體育總會參加，令市民有機會一次過接觸多種唔同嘅運動，甚至係一啲平時較少機會接觸嘅亦喺今次嘉年華入面可以親身嘗試一下，其中包括劍擊、棍網球、龍舟、活木球等等，機會真係非常難得。

另外，相信唔少人都有留意到較早前由中國選手柯潔 vs 電腦AlphaGo嘅一場圍棋大戰，呢場比賽可說得上係備受矚目，最終電腦AlphaGo成功以局數3：0完勝人類選手柯潔取得勝利。可能喺唔少市民心目中都覺得捉棋唔係一種運動，但係其實好似圍棋咁已經喺多年前成為左運動會入面嘅其中一項運動比賽，所以今次香港體育節嘉年華入面香港圍棋協會亦供市民嘗試一下捉圍棋嘅滋味，並且講解圍棋嘅初步玩法。

市民今次除左可以玩到唔同嘅運動外，大會亦設有抽獎環節，其中禮品亦非常豐富，其中包括49呎大電視、智能手機、相機、平板電腦等，市民都算得上係又有得玩又有得拎。而錯過左今年體育節嘅朋友唔使失望呀，下年記住多啲留意下本地體壇事，同埋記得支持下香港本地體育運動啦！