【動真格！】李小龍真打珍貴片段曝光！

文：MenClub Mr.波特　　圖：互聯網
POSTED ON 12 Jun 2017


相信李小龍呢個大名真係無咩人唔識，佢除左係一名影星之外，仲係一位非常熱愛武術嘅大師級人馬，佢亦喺有生之年自創左截拳道，雖然李小龍已經離開左世界，但係佢成功將截拳道傳落去，至今喺世界各地擁有大量弟子。

對於唔少朋友黎講，更多認識李小龍嘅可能係佢生前拍落嘅電影，好似《死亡遊戲》、《唐山大兄》、《精武門》等等，佢喺電影入面嘅打鬥場面令人印象深刻，其中雙截棍就更加係佢最常用嘅武器，每當拎出呢樣武器嘅時候，對手都絕對招架唔黎。可惜嘅係，呢位武術大師喺32歲嘅時候離奇死亡，其死因至今仍然係個謎。

李小龍喺電影入面武功了得，總係打不死咁，但係其實佢真人亦都真係強到令人難以想像，想信唔少朋友都曾經喺網上睇過佢嘅影片，佢嘅出拳快到人眼都追唔上，其寸勁威力亦都可以輕鬆震低對手，不過呢啲大部份都係李小龍喺節目上威範嘅片段，但究竟佢如果黎真對打嘅話，佢嘅截拳道又有幾勁呢？

日前，以下一段李小龍真身上陣嘅認真對打片段喺網上出現，可以見到佢同對手都著起全套保護衣，目的就係為左雙方都可以動真格。要知道呢段影片絕對係對於世界黎講極度珍貴嘅片段，因為喺眾多李小龍嘅影片入面，從來無一段係佢動真格對打嘅片段，雖然今次呢段影片只有大慨1分半鐘，而雙方又無真係好激烈嘅對打，但係亦已經可以睇到李小龍喺對打入面有幾咁從容，而佢大多以反擊黎進攻，每當對手出拳或出腳後，佢就會以極快嘅速度閃避後反擊出拳，其出拳速度實在快得驚人。

今次呢段影片再一次印證李小龍嘅武術有幾咁強大，如果將佢放喺現今世界入面，佢好可能會成為最強大嘅格鬥冠軍，咩「格鬥狂人」、「武林高手」等，都唔會係佢嘅對手！