【交易消息】D’Angelo Russell被交易至籃網！

文：MenClub Mr.波特　　圖：互聯網
POSTED ON 21 Jun 2017


NBA目前已經進入休賽期，雖然無比賽可以睇，但係仍然好值得球迷留意，因為球隊嘅交易已經陸逐展開，其中今天傳黎最大嘅一個交易消息係黎自湖人同籃網，其中湖人送走球隊上季嘅核心之一D’Angelo Russell以換來籃網主力中鋒Brook Lopez，呢個消息相信係今夏目前為止最令人意想唔到嘅交易。

今次湖人與籃網嘅交易除左上面提到嘅Russell同Lopez之外，其實仲有其他球員同埋選秀權加入其中，以下為本次交易嘅詳細情況：

湖人送出： D’Angelo Russell Timofey Mozgov

籃網送出： Brook Lopez 2017年首輪第27號簽

本身相信都無太多人會諗過湖人真係會送走Russell，雖然佢嘅人格同埋佢嘅防守力係有一定程度上嘅問題，但因為佢話晒上季已經開始展示出相當唔錯嘅得分能力，所以都難免令人有啲意想不到。不過，其實留意今夏湖人手握榜眼簽，佢地將好大機會簽下一位極具潛力嘅新秀控衛，其中可能中選嘅球員包括Lonzo Ball及De'Aaron Fox，因此即使失去Russell對於湖人黎講並無太大問題。

另外，能夠將Mozgov呢位球員送走先係今次交易嘅重中之重，因為呢位中鋒去年夏天同湖人簽左一份4年6400萬美元嘅合同，但係表現卻完全可以用惡劣黎形容，所以湖人千方百計希望可以送走呢份鬼合同。最終，籃網因為Russell嘅關係所以願意接收呢份合同，雖然吃下呢份鬼合同，但係佢地成功得到一位前榜眼，對於手頭上無好高選秀權嘅佢地，能夠獲得呢位年輕球員絕對係唔錯嘅結果。

不過，籃網送走嘅中鋒Lopez卻係球隊嘅第一核心，佢上季場均取得20.5分5.4籃板1.65封阻，而不論佢身邊嘅隊友配置係點，佢都係一路能夠維持20分左右嘅場均輸出，所以湖人能夠得到佢將可以大大加強內線嘅攻擊力。而更令湖人高興嘅係，Lopez上季已經完全開發出三分球嘅，上季場均出手5.2次三分，命中率達到34.6％，以中鋒黎講數據算係非常唔錯。

收下Lopez外，湖人仲收多一個首輪選秀權，所以佢地今夏將手握2號、27號及28號嘅選秀權。預計佢地應該會繼績有交易進行，所以佢地嘅選秀權將會喺很好嘅籌碼，例如用黎交易Paul George便會發揮到巨大嘅作用。

值得一提嘅係，籃網獲得Russell後，華人控衛林書豪可能會喪失原來嘅正選位置，不過以佢上季嘅表現相信仍然會有唔少球隊對佢有興趣，但係要比到佢正選位置嘅可能就無乜幾多隊啦。