【為冠軍！】這兩位老將會為總冠軍而加盟勇士嗎？

文：MenClub Mr.波特　　圖：互聯網
POSTED ON 22 Jun 2017


去年夏天，勇士成功獲得超級巨星Kevin Durant加盟，組成令所有球隊震驚嘅MVP組合Stephen Curry + KD，再加上原有嘅Klay Thompson同埋Draymond Green，以及一眾角色球員嘅配合，最終球隊喺常規賽再次成為聯盟一哥，而喺季後賽就更加大殺四方，以16勝1負嘅戰績三年內第二次奪得NBA總冠軍。

成功奪得總冠軍唔代表勇士咩都唔使做，因為佢地今夏將面臨組軍嘅一大難題，首先佢地需要同時續約Stephen Curry及Kevin Durant，雖然兩位巨星都已經公開表示自己願意唔拎頂薪留隊，但係就算佢地唔拎頂薪續約，佢地嘅薪金亦都係非常高昂，咁樣間接令勇士今夏簽球員時變得足襟見肘。

預計勇士後備陣容今夏將會出現大變動，當然核心成員好似Andre Iguodala同Shaun Livingston應該都唔會走，但係好似David Weest同Zaza Pachulia咁，佢地本身以低薪加盟勇士就係為左拎冠軍指環，宜家佢地成功拎到啦，所以應該會喺自由球員市場尋求合其身價嘅合同，所以佢地將好大機會離隊。

West同Pachulia喺勇士今季奪冠期間，都有住自己重要嘅角色，佢地如果真係離開勢必會令勇士嘅板櫈深度大幅下降。不過，其實呢一層勇士根本唔使擔心，因為勇士實力超班，所以令到一眾希望奪冠嘅老將甘願只係拎底薪加盟，為嘅就係一隻冠軍指環。

而就係West成功拎到冠軍指環後，又有邊位仲未嘗過總冠軍滋味嘅老將會喺今夏投奔勇士呢？

第一位相信就係「半人半神」Vince Carter，喺唔少球迷心目中Carter都係佢地嘅偶像，因為佢根本就係入樽嘅代名詞，佢嘅每一個入樽都充滿力與美。可惜嘅係，Carter生涯入面未曾嘗過總冠軍，甚至連總決賽亦都沒有打入過，如果佢宜家就退役，呢個相信係佢球員生涯一大遺憾。

而對於加盟勇士呢個選項，Carter持有開放嘅態度，如果有機會佢都想嘗試一下，雖然佢已經40歲，但係佢仍然覺得自己仲可以為球隊作出貢獻，而唔係只係空坐喺板櫈席上。上季Carter喺灰熊本來只係後備，但係其後因為Tony Allen受傷，所以臨危受命出任多場正選，最終賽季場均可以取得8分3.1籃板，而季後賽佢亦打得非常好，投射命中率達到47.6%，三分球命中率亦達到40%。

除左Carter，灰熊老將Zach Randolph亦係勇士可以選擇嘅後備人選，因為呢位35歲嘅老將今夏將成為自由球員，雖然佢應該會想續約灰熊，但係面對總冠軍嘅誘惑，Randolph絕對有機會加盟勇士，成為佢地嘅後備一份子，繼而爭取生涯首冠。岩岩一季，Randolph場均上陣24.5分鐘，可以取得14.1分8.2籃板，效率仍然非常高。

Carter及Randolph之外，其實仲有一位無冠老將可以考慮加盟勇士，佢就係35歲嘅Joe Johnson，不過如今嘅佢同爵士仲有一年合同，而最後一年合同並沒有球員或球隊選項，所以相信佢來季都會繼績為爵士效力。

能夠睇到Carter同Randolph獲得冠軍指環嘅一刻(特別係Carter)，相信一定會令人非常感動，因為呢樣係佢地球員生涯一直追求嘅野，窮一生努力喺生涯最後時光能夠得到嘅話，佢地都一定無憾了。