【球員絕技】施丹式轉身

文：MenClub Mr.波特　　圖：互聯網
POSTED ON 03 Jul 2017


作為一名世界頂級球員，總係會有一兩招絕技旁身，而如果你又可以自創某啲動作，並且可以將個動作用至爐火純青嘅話，咁呢個動作就好有機會成為你嘅標誌性動作，甚至用你個名黎命名。其中法國球王施丹就有一個絕技，相信大部份球迷都一定知道。無錯！就係施丹式轉身啦！

「施丹式轉身」固名思義就係一種轉身技術，而動作就係先將身前嘅足球向自己嘅方向搓後，然後利用另一隻腳連人帶足球順勢轉身，你個背脊就會貼住防守球員，咁嘅情況下佢會好難搶到你個波。

呢個動作唔算非常難學，但係要練到爐火純青，面對咩情況下都可以用到就真係唔容易，而其中施丹就係呢個動作嘅表表者，佢嘅控球由於已經去到有如行雲流水一樣，所以將呢種轉身加入其中嘅話，就會變得非常順暢，一搓一轉就可以過左防守球員繼績推進。

當然，呢個動作有唔少球員都會使用，但就無施丹咁用得咁頻密同完美，而每當佢地用上呢個技術嘅時候，效果都係非常好，所以未來球迷都係可以繼績喺比賽入面睇到呢項技術。

施丹式轉身除左轉身正面突破之外，其實當你練到完全融會貫通後，就可以進一步發揮呢個動作，當你轉身嘅時候唔再喺只會向前突破，你可以向橫帶又或者轉身直接利用後腳傳球，總之可以話係發動後你基本上可以隨心所慾咁控制之後嘅方向。

而施丹式轉身除左用黎過人之外，其實有時候亦會用黎救即將碌出底線嘅球，因為呢個動作嘅第一步就係將個波拉後，咁樣你就可以將個波係底線前停住，然後既然已經完成第一步，你就可以選擇繼續做埋施丹式轉身接下來嘅動作，一口氣完成救球以及過人嘅連續技啦！

睇完咁多球施丹式轉身嘅精彩片段，唔知你又學唔學得識呢？下次踢波個陣記得活學活用啦！