【直接！】普度斯基直言日本人有禮貌但對足球沒有用

文：MenClub 波特先生　　圖：互聯網
POSTED ON 08 Sep 2017

相信大家對於「科隆王子」普度斯基應該唔會太陌生，呢位年少成名嘅射手曾效力拜仁慕尼黑、阿仙奴、國際米蘭等大球會，而喺2014年更隨德國隊成功奪得世界盃冠軍。而近年，普度斯基已經淡出四大聯賽，今年更轉投日本J-League嘅神戶勝利船，結束自己喺歐洲踢波嘅生涯。

普度斯基現年其實只有32歲，但近年因為不時出現傷病，令佢競技狀態大不如前，因此佢先被迫遠赴日本踢波。而加盟勝利書後嘅首場比賽，呢位德國射手已經攻入兩球，令唔少球迷相當驚喜。之後嘅比賽普度斯基亦都有入球，但可惜嘅係球隊接下來只係錄得2和5負惡劣嘅戰績，目前排名J-League第11位。

而由於長久以黎都喺歐洲踢波，普度斯基生涯首次黎到亞洲地區繼續生涯需要唔少時間適應，其中悶熱嘅天氣對於佢黎講係一個挑戰，但係佢對於適應天氣充滿信心，認為自己好快會習慣。

球隊對於普度斯基亦寄予厚望，希望佢可以令其他球隊變得更好以及更加團結。對此，普度斯基認為日本足球嘅水平當然要比歐洲低，佢需要時間去理解呢個地方嘅足球運動係點樣運作，同時佢自己亦都會盡量調整自己令自己嘅比賽可以更高效。

另外，普度斯基亦講出左自己對於日本呢個地方嘅一啲感受：「日本人很好、很有禮貌，但呢啲對於足球黎講一啲用處都無。」

確實喺歐洲踢波為嘅就只有勝利，為左勝利有時候更加可以不擇手段，對對手仁慈就等於對自己殘忍。相反，日本一直係一個禮貌行先嘅國家，往往可能著重禮儀多於勝利，呢一點可能對於普度斯基黎講先係最需要適應嘅野，與期花時間對人鞠躬，佢可能認為不如射多兩次波啦。